ATM vörn er staðall sem almennt er notaður fyrir vatnsvörn á snjall- og heilsuúrum. ATM stendur fyrir “atmosphere” eða hversu mikinn þrýsting tækið getur höndlað hreyfingarlaust undir ferskvatni. ATM vottunin er sett fram á þann hátt að tölustafur sem merkir hversu mikinn þrýsting tæki höndlar er settur fyrir framan ATM, t.d 5ATM.
5 stendur þá í þessu tilviki fyrir að tækið höndli 5 “atmosphere” af þrýstingi eða vörn niður að allt að 50 metra dýpi í ferskvatni.
Rétt eins og með IP vottanir þá taka framleiðendur almennt ekki ábyrgð á vatnstjóni.
ATM vörn getur dvínað með tímanum og við almenna tæringu og notkun tækjanna sem vörnina bera. Vörnin er mæld við ferskvatn og án hreyfingar á tækinu.
ATM vörn nær ekki yfir snöggar þrýstingsbreytingar eða hitabreytingar, t.d að dýfa sér í vatn eða fara úr köldum potti í heitan pott.